paparikan: DG. Kumarsana
Ningeh gerudug munyin petenge
sesek wangiang ambun penelas ngenyit dupa
ipian ene ngedil bakat ngusak-asik
“dini gen makemit malu ngemitin kayun Ida, lan makidung”
Nganteg semengan
Engkenang mapi-mapi nakeh tuuh leluhure?
imbuhin besik satmaka nancebang dupa
(alum andus dupane nambung ka duur langit langit merajane)
enu I raga kita magpagin igel-igelan rejang
- para dewata-dewati pacang tedun
Nyabran piodalan -
nakeh ragragan ane
ilid baan pesiatan di peteng
peteng mapiakan nekep endih dedet kenehe ane tuh gaing
tusing masunaran : “Ida wangde murka”
di asagan padmasanae
maembahan, malinder-iderin di usehan
kauluh baan tanggun sangsayane
tareke krana layahe ngucap
di lebuh kalane
sambrag keneh ane kadirasa
nuutang natakin keneh boya ja nagih-tatagihan
usuin tresna tepu
neked di tanggun paling ning-ningan mamung
di wates kenehe mamung
di wates makejang igel-igelan
dija-kone gamelan
lan gong suud ngambar kayun Idane
uli wirama mamung-dedet
wiadin kadirasa sang dedet ngalih tanggun petenge
buka anake maboros ipian
mirib sig palet ane encen ngawitin watese ane lebar-baan tatwa
Dewata-Dewati masolah tan paswara gamelan
ane kadirasa uyut-girang panglila cita Ida Bhatara
ngaud tumbak masaput poleng nguluh lebuh merajane
lebuh belus baan tabuh rah
lan ningeh para kawi ane ngedur ngawetuang kidung
Tidak ada komentar:
Posting Komentar