Paparikan : DG Kumarsana
lawat akit sesapi ngaliwat joh tegeh ka bukit mabatu
puun morbor gatra sing neked, nakeh atmane, belahang langit
unduk sunia ning nyap-nyap lawatne ngantiang mati
tongose maenjekan natah mati lan ngancan joh ulian lilih, buka kapaca ilid petala kacunduk Widhi nembang-nuunang gegemet mamung katulis baan ambu
tresna mamocol, dulengek tiang arad sunaran Idane
ngalawan matanai sing ngoyong-ngoyong morbor kampidne
ngelepak ngae aas don-don sekakatih
idup enu sambrag lan kenehe makita malajah sid i paksi
tusing taen kenjel kampidne ngelepak, ngelungang pikobet
tuah, tresna mase aluh omongang baan pipis
tresna ane tusing nandruhin tiwas mabayah baan semaya tatas
newek i raga konden nyidaang ngalekas pawiwahaan baan semaya damang
lan jabag ene nyetset baan padewekan mamung
enu ngantiang anak cerik, encen kal lekad
ane jaga nyagra masan tua mani-wekas uli blagbag panti jompo
makire bangka enu ngitungang tuuh ane ngancan rompod
tegarang duduk kelepakne, entungang ka pungkuran warsa
sing prelu ngiwasin sapute lantas nyen ane ngelekadang rare-rare mani-puan?
rikala ketara ngancan tuuhe aas lan rompod smara ati
rheumatik lan asam urat ane ngilidin diagnose doktere dogen
tuah jejehe ento ilid sig kampidne klakasan
rikala i raga ngancan tua manut keneh ane mulisah mamadik sawa
rikala ilu ene suba ngalahin raga kadirasa ngenehang lobha mani-puan ane sinah kapaca
sesapi majubah ngalawan angin, ngeberang ujan
madui bek wireh mani wekas tuah tuuh sing masisa
sid bangke nengel makuakan, sebet masaput sunia
ane naenang saru,kolok lan gapi-jejeh
keciwa masaput sunia baan onya
angen ne-te muungang i raga ngingetang pejalane
-yadin nyuudang tresna
ane kenjel ngentasin jejeh masaput jejeh
ngelilig sid tanggun bukite, keles ngentasin
sunia
Tidak ada komentar:
Posting Komentar