Peparikan : DG. Kumarsana
Satondene lara nira masaput
ksatria jagat kuru
duh, Bisma teruna bantug
adake satua ngencanin jaga pasarean
satondene pil nakeh dosis ngilidin jantunge
ane labuh maglebug magaleng baan panah
wiadin maan nungkasin orta maboya
dulengek nletekin ujan bunga
dewa dewa asih smara
teruna malawat langgana (baan pesu isin semayane mapiteket)
Nanging suba nguluh sumpah, maglebug buka layah bajang ngulurin warsa majalan
siu mill tuuh ane nyandang pisan
ngedum lacur ulian atma baan nyilih
buka ngupin angin kalara-lara
: Srikandi malaib sig alas nembangin sebet
Ngilidang kendel (ngiket sutresna asih)
uduh, smara sang lulut, ngrimik Bisma tan kacunduk tresna
kacundang baan piteket jadig
neneng smara buka batu gulit
kenehe buka beton pangukuh baja
nakeh lan nandang kayun
ngardi pajalan pait pakeh kenyih tresnaning
bendu baan pastu jabag, kapastu lulut
;nyerit Bisma nyetset langit
nguluh kakayon
nancebin satua
ngencebin raos
ngenehang smara punggel
Tidak ada komentar:
Posting Komentar