ENGKEBANG KENEHĔ, LUH!

Luh, eda bes daat majalan ngecagang keneh

apang tresnanē tusing angob baan mulisah

rērēnang malu sig tanggun rurungē

Luh, eda bes dalem gati mapikenoh ring manah

lakarang bisa ngaē buduh

krana guminē enē mula buduh

Luh,eda bes daat ngarepin rahayu

engkebang kenehē abedik

mani puan tiang lakar merluang

ANGEN NGUDIANG ANGEN

Matanē sinah ngengkebang sebet bengul

yēhmata , buka blabaran tukad unda lan luh jegēg kabebelan mabo cuka

pengah.......!!!!!

kanti anginē teka tusing nampi gatra, runtag buka natahē kabrebeh

luh bajang ngraja, matimpuh di lawat balē bengong:  malawat Srikandi

ngoyong busan busan ngēgol cara nak buduh

buung ngewatesin kenehē ilang sig pungkuran

abetnē anē jejeh

lan milu ngengkebang keneh inguh uyang-paling

            natakin semeng ulian keciwa sig laklakan atinē

sunia

Tusingkē teked ngrimikang enduk kenehē

mimih.....dēwaratu agung! mabuaka angen karindu-rindu

Nyesed keneh linyoh tekēning samaya

sig muncuk langit langit ati

anē ngedil linjok

                        :angen

                                  pagelanyat

malaib sungsang mamucu

ilik bayunē

NGENTASIN SENGGIGI III

Jani Senggiginē malalung sing makalung

buka anak ngamah balung puyung tanpa isi

lamun petēkin sabilang bucun hotēlē

lan tanggun home stay, konyangan nguluh bebai ulian dompēt puyung

lenga ngaba kondom panyuudnē ibuk ngalabuhang belingan

lamun petekin konyang sing kodag-kodag liunē sētra majalan

bes daat hawa freedom, makalukan ngarajah atma buung

-virus HIV pagelanyat

Jani Senggiginē malalung sing suud-suud magulung

baan pēsta musik bēbas sambilanga kecog-kecog cara bojog

nguluh miras nganti tēlēr

luh muani maadukan turis lan jelema pribumi

cara buyung berung

ngantiang dollar ulung

AJI SUAP (premanisme DPR)

Sajan, ru…….

200 jute nyuap

ulian kursi pemrentahan

mimih…menek ia dadi ketua partai

baan mata nelik, kijap-kijap nakeh bati

paparikane, ru…….

ngandelang proyek pacang nampi

pacekang gumine dadi sugih baan korupsi

PAKSI NGEDIL

Ngedil mekeber tegeh mentangin langit lan tegehan pasih

ngelepak kampidne nyujuh langit

receh angine ngaukin ujan

nekepin sunia di galang kangin

tegeh ngindang di duur gunung

nambung makeber nyerit mesbes keneh

ngangsur ungkah-angkih

ngurung lawatne sang paksi kateteh masunar matanai

uli useran yeh pasihe nganti nyat

uluh matanai lan sang paksi metinggah

nguluh warsa

maksa keneh puyung mamung gumine

ujug-ujug ngetelang keneh

nombaang abetne tastas telah aas sekabesik

maboya-boya nantangin gumi mentangin selat pasih

buka kampid matatu gelah paksi ngedil

mangenan

makeber

buung