BATAN MONING NUJU MONANG MANING

Uli Batan Moning ngalih dagang satē

Ngantiang tumpangan di penambangan  suci

Kondēn ada taxi buka cara jani

Lamun sing maan negakin bis Gitabali kel sing nyak luas mulih, kēto luh masaut

Nah dini merērēn malu sambil ningalin dagang lotrē : nomer buntut magantung di kiosē

Dugas ento liu anakē ngadokang nasib baan milih milihin angka

Nyēn nawang!

Nepukin aget

Ngayalin nasib mayah tiwas, lamun nyak juari pesu angka kesugihan

Lakaran suud bli nyewa bis tumpangan di penambangan suci nuju mulih ka dēsa

Uli rantauan gumi Badung

Batan Moning taen masē ngecagang keneh

Kuangan pipis lasia nganggeh di dagang nasi mēn Wali

Sing ade super markēt cara jani selianan kēn warung batan tiying

Anakē lingsir madagang kacang negak sabilang peteng medamar saru ngantiang anak mabelanja

Nekol ia di bucun marga kayumas sambilanga nguntul

Pebalihe jak dokar tur jaranē gapi mejējēr ngantiang penumpang

Tondēn ada cineplēk cara jani lamun perlu hiburan kanggoang nyongkok di alun alun puputan Badung ngantiang kelir mekebat melawat sunar proyektorē : pilem koboi nyelek cunguh jaran

Sing taēn med bakat pebalih

Kondēn ada  pilem satria baja hitam, Doraēmon cara cerik cerikē pebalih jani

Batan Moning nuju Monang Maning ipidan pragat baan dokar neked

sing telah telah ngecagang kenangan

Dugas I luh ajak bareng lacur, uli pide lega

nganteg jani

KURIKULUM NGELINCAK

Jani apabuin modēl pembaharuan, jaman ortodok nguluh medēren

Kecag akal kultur

Basa daērah ungkulin baan politik

Maadukan dadi besik

Generasinē gapi pawah melajahin

Kurikulum basa daērah ngelincak sang sanē metuang pikobēt cara nak paling

Ane ngerasa ngerti lakar ngelkel kedek ka tundun

Tur generasi aluh ngancan sing pati rungu

“yang penting guē lulus” kēto abetnē nyornyor ala jaman modēren

Lasia basa baline katindih maungkulan di museum

Dadi gudang arsip

AMENIT DOGĔN (smara puruh)

Kēnē mirib smara nanggehang keneh

makejang dadi aluh, makejang ngaē bani

teruna teruni nganti bani mapas kala

anē penting angen matemu

yadiapin guminē mabading, reramanē bisa papase

kenehnē tuah besik : matemu

yadiapin lemah masambung peteng

lemah peteng anggo patuh, semaya anggo nyancang baya

yadiapin tembahang, bhuta kala bisa uluhe

teruna kalawan teruni, ulap baan smara

nawahang sebet tan masisa

nyake ada tutur beneh katampi pelih

beneh lan pelih maadukan

smara buta, katumben-tumben

ngaē buduh paling

bisa ngengsap ngamah

nyake ngelah pipis, apabuin tusing

asal maan matemu amenit dogēn

kangguang

smara keten-keten ngartiang pajalan idup

sing penting

sasubanē ngantēn mani

lakar pragat kijap kijap ngetohin payuk jakan puyung

merana kalara-lara metēkin bulun matan rerama

sambilang natakang lima

lan ngaraos ngaē ngelkel pisaganē:

            ” baange ja cucu nē jani mēmē lan bapa”

Keneh matemu tuah amenit

bes-bas ngajumin smara tumbēn

ngaē sangsara tibanan

lan ngaē otak puruh

diagnose sakit saraf, dayanin suba!

 ēndrin orahange coca cola

mimih!!

Smara ngēncolang ngaē puruh

amenit dogēn?

INGET MĔMĔ

Mē, eda ngorahang tiang buduh

pragat nginem lan memunyah

ngutahin peteng ulian gedeg di jumahan, apabuin ulian pelarian frustasi

nganti telah tanpasisa ngulihan ulegan basangē

kadirasa  dugasē mamunyah makita nawahin agelekan dogēn

nganti slegēk-slegēk kolonganē nandan awak

Mē, eda ja ngorang tiang buduh

dugas inget taēn memaling pipis di dompet batan galeng gulingē

krana tiang perlu tuah masē ulian demen jail

inget sing, mē!

dugas tiang enu cerik sing buung-buung nyakitin keneh mēmē

                        : sing nyak masekolah lamun sing beliang montor vario

nanging sing taēn dingeh mēmē wadih ngingetin tiang

nganteg jani

ENGKEBANG KENEHĔ, LUH!

Luh, eda bes daat majalan ngecagang keneh

apang tresnanē tusing angob baan mulisah

rērēnang malu sig tanggun rurungē

Luh, eda bes dalem gati mapikenoh ring manah

lakarang bisa ngaē buduh

krana guminē enē mula buduh

Luh,eda bes daat ngarepin rahayu

engkebang kenehē abedik

mani puan tiang lakar merluang